我點解黎咗西西里？

係2014年雨傘期間，我係煲底努力了解香港人對民主既理解，亦思考我作為公民既角色，知道民主並不是四年一度既一人一票活動，而係對未來既想象，並付諸實行。

係一個高度國際城市化既香港，面對著社會既問題如資源分配不公不均，水源污染，資源浪費，產業單一化，經濟發展傾斜，糧食過度依賴，以至種種國際金融貨幣政策相關問題，究竟點樣既日常生活體現到我對社區既想象呢？

面對著呢d問題，我選擇左歸園田居，但係並非逃避，而係面對真正既生活。

係香港，我曾經幫過朋友打理一小塊田，甚至諗過係香港規劃eco Village ，但經過一年既體驗，我見到係香港，無論係天然環境，定農業政策都同我想象既有距離，所以我係2016年暑假飛到西西里。

點解西西里?

我黎之前並唔認識西西里，但就係法國同意大利之間陪迴。最終係一個打工換宿既 platform幫我做左決定。

我見到一個有80幾種水果既小果園，真係流哂口水。好快同唔知係未來老公既 Guido 定好打工換宿既日期，我就 book機票。

到步當日，Guido到火車站接我。當駛到 farm gate，沿著小路駛入，周圍都係花草樹木。係左邊隱約見到個 farmhouse，架車「登登下」咁駛左一陣，再左轉就見到一幅靚到好似睇緊歐洲電影場面咁既畫面！

黃黃綠綠既果園，外圍攀著半成熟既提子，遠處既海天一色，背面仲冒緊煙既活火山，所有都係燦爛既陽光下blink blink blink。First impression太 perfect啦！

而我第一份job係摘 mulberry。要爬上幾米高既 mulberry tree，小心奕奕咁將一粒粒超delicate勁爆汁 mulberry 摘下。摘完，我明白點解我係香港係未食過咁好味既 mulberry，因為佢真係要即摘即食架！

自給自足?

黎到西里天堂，真係唔想走。Guido有個果園，我咪諗可以自給自足啦！見到隔離有d 荒廢左既檸檬園，真係唔明d人點解要走喎！

慢慢了解先知，國際貿易條款對世界各地既農業或其他行業真係影響好大。由於市場追求平，好多小型家庭式既農場都做唔住，而大型既就可以take advantage of economic of scale。而超市既出現亦都令食物既品種收窄。聽落好反常理，但係你認識既橙有幾多種，食開既薯仔又有幾隻，仲有聽過既蘋果又有幾多種？？

當然國際貿易唔係唯一原因。好多西里二代都去左意北或外國打工，因為工業都係北部，當地出現工資剝削。久而久之，年輕人流失，當地既經濟變差。好快我明白，人同工同發展係 cycle。冇工，邊度有人，冇人，點會有$！所以我地要自保（可持續發展），就要有人，要有人，我地要有工俾人。

吓，我要做老闆？

我終於明白點解當年福特汽車會俾員工8小時工作制啦！佢地要有時間先可以洗錢，將d$洗番落間公司度。福特為自己製造currency。原來社會制度不公，唔係透過唔參與，而係透過參與創造去改變！

社會不公太多，公道老闆太少！我要做個改變社會既老闆。

飲水思源

講到做老闆，我有政治潔辟，我內心出現左社會主義 vs 資本主義既思想鬥爭！

資本主義社會好似係萬惡咁！但係邊個話資本主義就要剝削員工，破壞環境架。Adam Smith係寫 the Wealth of Nations之前係先探討 Theory of  Moral sentiments 先架！佢既無形之手自由市場係建基於有公義既社會，人可能自私但不傷害他人利益，因為人自私到某個程度，社會唔會再 run到落去！

即係話，而家成日講既社會責任根本就係屬於資本主義既一部份。咁賺錢要有社會責任，咁駛錢係咪都要講社會責任呢？

羊毛出在羊身上，呢句野 sum up左 Adam Smiths既理論啦！其實賣野既同買野既係一體，一起構成個經濟社羣。作為消費者，如果只係考慮平，而唔睇背後既社會成本，環境成本，甚至道德成本，個社會久而久之就再run唔落去，聽落，個故事係咪熟口熟面呢？？

香港好多人搵到好多$，但亦有人好貧窮；香港既市場幾乎係要乜有乜，但浪費亦嚇死人，究竟呢d係淨係賣野個d要反思，定係大家作為呢個經濟社羣要一齊諗既課題呢？

品味重新定義

一句到尾，我賣野既原則係要支持有兼顧社區健康（食物質素），多元社區經濟發展，環境保育（物種多元）同重視小農同消費者之間既關係。

呢個世界既飢餓同貧窮根本唔係因為缺乏，而係分配不公，所以我地係想透過小農直送呢個平台同大家分享食物唔係淨係好唔好味，有冇營養咁簡單，背後仲有好多物種，生產同人既故事。

我地要重新定義品味，真正既品味係有內涵，知道底蘊，甚至能道出歷史，說出道理，而唔純粹係有$就買到既快感。我地要滿足香港人有$都滿足唔到既情感，呢個就係我地為你地準備既品味。

我嘅故事要加埋Guido 個半先完整！

Guido並無好似好多年輕人咁離開左西西里，因為屋企有個檸檬園。一個由曾祖父留下黎既 masseria ，一個釀酒賣去法國既酒農。係呢一行開始沒落之前，祖父買左另一塊地種左一遍檸檬。係檸檬被外地檸打得落花流水之前，阿爸將自己既果園慢慢轉變為亞熱帶多樣品種果園。係市場追求量，務求薄利多銷既情況下，Guido 努力建立自己既嘜頭，發展小農同顧客直接既關係，努力令大家明白小農既價值。

我見到香港同西西里好似lock and key 咁一凹一凸。

就係咁, 我變咗西里小農。

下面係一個德國女孩幫手整咗一條關於「我嘅故事」」嘅片